Во рамките на проект на УСАИД – „Општински стратегии за климатски промени“ кој го имплементира Милиеуконтакт Македонија а локални партнери се Центарот за лековити билки и шумски плодови „Амброзија“ и општина Пехчево вчера, на 16.06.2014 година на градскиот плоштад во центарот на Пехчево се одржа настан – локална кампања посветена на климатските промени. Целта на оваа кампања беше да се подигне свеста кај граѓаните за постоењето и влијанието на климатските промени , односно еден вид вовед во поимот „климатски промени“, „Што претставуваат климатските промени?“, „Кои се нивните влијанија?“ , „ Кои се начините за нивно ублажување?“ , „Што можам јас како поединец да сторам во мојата општина?“ итн. Поедноставно кажано: „Климатски промени – за почетници”.
Настанот беше посетен од голем број граѓани на општина Пехчево кои со голема заинтересираност прошетаа во патничкиот тунел „климатски промени“ и се запознаа со негативните последици од климатските промени и како да се адаптираат на истите.
Во рамки на настанот, од страна на Градоначалникот на општина Пехчево Игор Поповски и Претседателот на Центар „Амброзија“ Јасминка Пашалиска-Андоновска беа доделени и наградите за најдобри литературни и ликовни творби од претходно спроведениот конкурс во ООУ „Ванчо Китанов“ на тема „Јас и климатските промени“.
