Во Пехчево ќе се реконструира старата гимназија, каде ќе бидат сместени дисперзираните паралелки на беровската гимназија „Ацо Русковски“.
За проектот за реконструкција на старата гимназија изработен од Општина Пехчево, е распишан тендер, а Министерството за образование и наука има одвоено 9 милиони денари, информира градоначалникот Игор Поповски.
– Планирана е комплета реконструкција на училишната зграда. Ќе се реконструира стариот кров на училиштето, ќе се стави нова плоча, нови прозорци, односно ќе добиеме современо училиште. Ова значи дека ќе ја вратиме образовната функција на старата училишна зграда. Ние одамна сакавме да се реконструира и конечно, овој проект ќе го реализираме, рече Поповски.
– Настава се следи во училници од деветолетката „Ванчо Китанов“. Со реализацијата на овој проект ќе се реши голем проблем за нас, и за учениците и за наставниот кадар, што ќе значи подобри услови за работа, рече тој.
Според најавите, градежните работи на старата училишна зграда треба да завршат до крајот на летото, а новата учебна година пехчевските средношколци ќе ја започнат во нови училници.
