Денес со почеток во 12:00 часот, Караванот на букви и броеви, Проектот на УСАИД „Со читање до лидерство’’ го посети ООУ,, Ванчо Китанов “ – Пехчево. Караванот ја промовираше Библиотеката на тркала – возило кое е пренаменето во подвижна библиотека и е опремено со сликовници, книги, едукативни игри и други материјали за најмладите ученици. Сите ученици од прво до трето одделение ја посетија Библиотеката на тркала која беше поставена во училишниот двор за време на настанот.
Додека едни деца вежбаа математика надвор, други влегуваа во комбето “Библиотека на тркала” пред училиштето и таму, заедно со наставниците, читаа и броеја.
Караванот на букви и броеви и Библиотеката на тркала се дел од активностите кои Проектот на УСАИД „Со читање до лидерство“ започна да ги спроведува во дел од основните училишта во државата со цел да претстави активности преку кои учениците и членовите од нивните семејства на забавен начин можат да учат мајчин јазик и математика. За таа цел, проектот соработува со повеќе јавни личности од областа на театарот, музиката и спортот и заедно со нив спроведува заеднички активности за читање и математика со учениците од почетните одделенија.
