Денес во салата за состаноци при општина Пехчево се одржа „Отворен ден“ со Агенцијата за храна и ветеринарство на кој присуствуваше директорот на Агенцијата за храна и ветеринарство м-р Зоран Поповски, со претставници од секторите и одделенијата во Агенцијата, а со цел да се понудат информации и решенија за отворените проблеми со кои се соочуваат сточарите и операторите со храна, со кои оваа агенција директно соработува.
На средбата, граѓаните и компаниите од земјоделско-прехранбениот сектор имаат можност да се запознаат со работата на Агенцијата, да дадат предлози, да се информираат за прашања кои се од нивни интерес, а се во доменот на работа на Агенцијата, како и да побараат стручна помош.
Компаниите од земјоделско – прехрамбениот сектор добија информации за прашања во доменот на работата на оваа институција како и за начинот на обезбедување на информации за храната на потрошувачите, кој секогаш треба да биде транспарентен и во согласност со домашните прописи кои треба да се усогласат со прописите на Европската Унија.
На денешната средба во Пехчево, директорот на Агенцијата за храна и ветеринарство, Зоран Поповски го промовираше Водичот за добра практика за операторите со храна во однос на новите барања на ЕУ за означување на храната.
