Новоизбраниот градоначалник на Општина Пехчево, Александар Китански утре официјално ќе ја преземе функцијата.
Според најавите од Општинската Изборна Комисија, Китански утре во 10 часот ќе го добие уверението.
По примањето на уверението од страна на Општинската Изборна Комисија, Китански ќе има средба со досегашниот градоначалник Драган Тренчовски, по што и ќе ја преземе функцијата прв човек на општината.
Китански најави дека првите чекори како градоначалник ќе му бидат насочени кон подобрување на квалитетот на живот во општината и реализацијата на проектите од неговата Програма со која ја доби довербата на граѓаните.
Инаку, Александар Китански како кандидат на ВМРО ДПМНЕ и коалицијата во вториот круг на локални избори што се одржаа на 31 октомври 2021 година ја обезбеди довербата на граѓаните да ја води Општина Пехчево во наредните четири години.
