Заменикот министер за локална самоуправа Дејан Павлески, вчера беше во работна посета на општина Пехчево, кој оствари средба со градоначалникот на општината Драган Тренчовски, со цел информирање за идните планови и проекти на Министерството за локална самоуправа, како и следење на активностите кои ги презема општината во однос на прекуграничната соработка со Р.Бугарија.
Градоначалникот Тренчовски го информираше заменикот министер дека општина Пехчево посебен акцент ќе стави на проектите кои ќе ги аплицира до Бирото за рамномерен регионален развој, но и дека општината е фокусирана и кон искористување на средствата од ИПА програмата за прекугранична соработка со Бугарија и дека во изминатиов период општина Пехчево со средствата од Европската Унија во завршна фаза е реализацијата на проектот „ Платформа за прекуграничен фестивалски туризам на полето на традициите и културата – Фолклор“, а со нов проект се планира да се обезбедат средства за реконструкција на речното корито на реката Писа во Пехчево.
Заменик министерот Павлески безрезервно ја понуди својата поддршка и помош за развојот на општина Пехчево, преку реализација на проекти во надлежост на Министерството, како и проектите од прекуграничните програми и повиците за соработка, и изрази задоволство од програмата за развој на општината која што е насочена кон реализација на проекти за равој на туризмот.
Инаку, општина Пехчево во моментов разработува неколку идеи за аплицирање на тековните повици и повиците кои треба да излезат за краток временски период, со што се отворени нови можности за прилив на средства за реализација на повеќе проекти во општината.
