Денес во Општина Пехчево, беше организиран завршен настан како дел од Кампањата за заштита на природата и биодиверзитетот, која е дел од едукативниот проект ,, Патеката на Петко и шумските жители – пехчевска авантура “ кој во изминатиот период се спроведуваше во ООУ,, Ванчо Китанов “ и детската градинка „ 7 Септември “.
По повод спроведувањето на Кампањата за заштита на природата и биодиверзитетот во Брегалничкиот регион, проект,, Патеката на Петко и шумските жители – пехчевска авантура “ во ООУ. ,, Ванчо Китанов “ изминатите денови беа реализирани повеќе активности и тоа: Предавање на тема ,, Заштита на природата и биодиверзитетот во Брегалничкиот регион “ од страна на наставничката Валентина Станоевска. На предавањето посебен акцент беше ставен на заштита на инсектојадното растение од ендемичен вид Дросера Ротундифолија – муволовка, беше распишан ликовен конкурс за сите ученици, а како посебна активност беше реализирана работилница со учениците за изработка на хранилки за птици.
Во холот на училиштето ,, Ванчо Китанов “ сите активности кои беа реализирани во изминатиот период од страна на учениците, денес беа изложени за посетителите, а и официјално беа прогласени наградените ликовни и литературни творби. Наградите се во две нивоа за учениците од одделенска и за учениците од предметна настава.
Исто така во детската градинка „7 Септември “ денес беше презентиран проектот, а беа изложени и изработките од страна на децата во градинката и вработените.
Едукативниот проект ,, Патеката на Петко и шумските жители – пехчевска авантура “ се реализира од ОХО и е дел од Програмата за зачувување на природата во Македонија.
Целта на кампањата е да се подигне свеста кај учениците, наставниците и другите вработени во училиштето за важноста на природата и биодиверзитетот во Брегалничкиот регион, како и да се влијае врз долгорочна промена во однесувањето на учениците и пошироката јавност.
Инаку, Програмата за зачувување на природата во Македонија e поддржана од Швајцарската агенција за развој и соработка (SDC) и е наменета за поддршка на активности за зачувување на природата и локалниот развој на Брегалничкиот регион.
