Синоќа во кафе бар „Ким“ по повод 21 Март – светскиот ден на поезијата се одржа манифестацијата „Поезијо те сакаме“ во организација на Матична библиотека „Кочо Рацин“ – Пехчево.
Одлуката 21 Март да се прославува како светски ден на поезијата беше усвоена во Париз во 1999 год. на 30-тата сесија на УНЕСКО. И оттогаш денот на поезијата се празнува со книжевни собири низ цел свет и поетите од сите континенти праќаат пораки во чест на стиховното творештво“ -ова синоќа го истакна библиотекарката Габриела Костадинова поздравувајќи ги присутните гости.
„Вечерва сме собрани овде да пишуваме стихови во чест на поетското творештво како дел од светското културно богатство и да ја подржиме кампањата „Плати кафе со поезија“- рече Габриела.
Поезија пишуваа учениците од основното и средното образование, како и возрасни читатели од разни профили (лекарки, професорки,наставнички, пензионерки) сите во улога на поети и поетеси.
Темата беше слободна по избор на учесниците.
Сите песни беа добри, но сепак беа наградени четири учеснички и од страна на библиотеката им беа доделени дипломи за освоени места и книги, а на останатите учесници Габриела им додели благодарници и книги за нивното учество.
Прво место освои Лина Велковска, а второ место освои Лилјана Стефановска, додека третото место го делеа две ученички и тоа Маја Пандова и Катерина Каракашова.
Манифестацијата заврши онака како што и почна релаксирано, опуштено со музика, кафе и си со читање на наградените песни.
