По повод Светскиот ден на здравата храна, дечињата и вработените во детската градинка ,, 7 Септември ’’, денеска се вклучија во одбележувањето на Светскиот ден на храната -16 октомври.
На прекрасно уредени маси во дворот на градинката беше презентиран богат избор на свеж зеленчук и овошје, храна подготвена од рацете на воспитачките, негователките и дечињата во градинката.
За значењето на Светскиот ден на храната пред домаќините и гостите зборуваше директорката на градинката, Гордана Вазлиска.
Производството на здрава храна, произведена на органски начин без пестициди, осовременување на начинот на производство и конкурентноста, се основните темели на кои децении наназад цврсто и сигурно опстојува градинката. Сакаме да создадеме генерации кои ќе имаат поинаков однос кон храната, начинот на нејзино производство и нејзиното консумирање. Нашата мисија ќе биде успешно завршена кога нашите ученици ќе станат лидери, но истовремено и борци за здрав начин на живот, кој е возможен само преку здравата и правилна исхрана, рече директорката Вазлиска.
Одбележувањето на овој ден во градинката се реализираше со следната агенда:
1.Отворање на настанот – Предговор за програмата за едукација на децата од предучилишна возраст со процесот на одгледување и консумирање здрава храна.
2.Промоција на упатство за здрава храна
3.Прошетка во градината и берба на култури
4.Консумација на производи и сокови од овошје и зеленчук приготвени од дечињата и учителките
Преку програмата за едукација на децата во процесот на предучилишно воспитување, тие дознаваат за здравиот начин на исхрана, за значењето на овошјето и на зеленчукот. Притоа преку координиран пристап во детските градинки, почнат е процес на создавање градини преку кои децата можат да се едуцираат за начинот на кој се садат зеленчукот и овошјето, но и за хранливите состојки, и да стекнат здрави навики со што во иднина ќе се влијае на создавањето здрави навики за живот на секое дете.
Покрај децата и вработените во градинката, на одбележувањето на Светскиот ден на здравата храна присутни беа и родителите на дечињата.
Инаку, Министерството за труд и социјална политика, под чија надлежност се градинките, последните години практикува проект за здрава храна во градинките.
