Во организација на детската градинка ,, 7 Септември ’’ , најмладите ученици, со најразлични активности, го одбележаа денот на шегата во Пехчево.
Плоштадот беше претесен да ги собере сите заедно, дечињата, нивните баби, дедовци, мајки, татковци. Оваа убавина од бои и креативност на наставниците и родителите да ги маскираат своите деца во омилените јунаци денес беше привилегија да се види, но и да им се оддаде признание.
На плоштадот во Пехчево се пееше, се свиреше, а најмногу од се се слушаше детската смеа. Експлозија од бои и костими, најмладите покажаа дека детската фантазија не познава граници. Идеи поттикнати од ликовите од цртаните филмови и омилените бајки, буквално можеше да се види се и сешто. Најразлични маски ги криеја лицата на веселите деца кои маскирани во своите омилени ликови од приказните и цртаните ја развеселија и воодушевија публиката.
Беше видлива и среќата на лицата на секој родител, сите подеднакво среќни и возбудени, благодарение на детските ведри насмеани лица.
Пред дечињата и присутните на плоштадот во Пехчево се обрати градоначалникот Игор Поповски.
– Сакам да ги поздравам најмладите и најмалите коишто се собрани овде со нас да не насмеат и развеселат. Мотивот на маската е поттик, ученикот да размислува на убавите работи кои го опкружуваат и како истите да ги подобрува, или оплеменува. Гледам многу маскирани дечиња и така и треба, зошто на 1-ви април, треба да проработи креативноста и сите ние да се препуштиме на музиката, забавата и смеата. На вработените во детската градинка ,, 7 Септември ’’ им посакувам многу успех и уште многу вакви настани, истакна градоначалникот Поповски.
Традиционално, секоја година денот на шегата 1-ви Април Општина Пехчево го обележува заедно со најмладите граѓани.
Денес во духот на радоста и шегата во посета на локалната самоуправа и градоначалникот Поповски беа дечињата од второ одделение при ООУ ,, Ванчо Китанов “. Со песни, игри и многу шеги му го насмејаа лицето на градоначалникот.
Градоначалникот им се заблагодари на дечињата и учителката што не ја пропуштаат можноста да ја посетат општината во секоја прилика и им порача на дечињата да размислуваат само на убави работи, постојано да се весели и насмејани.
Кликнете на било која слика и уживајте во галеријата.
