Со ревијален настап на дувачки оркестри од Бугарија и Србија,и со концертот на Љубојна синоќа во Пехчево започна седмото издание на традиционалниот Фестивал на дувачките оркестри -Пехчево 2017. Концертите на познати балкански дувачки орекестри на првата вечер од Фестивалот ја проследија илјадници гости од регионот и цела држава, како и од соседна Бугарија.
На отворањето на фестивалот, градоначалникот Игор Поповски истакна дека Пехчево ја продолжува оваа убава традиција која прераснува во бренд на Источна Македонија, но и на цела држава, а трубите станаа синоним за Пехчево.
– Сакајќи да ја сочуваме традицијата на малешевските труби кои се составен декор од секоја слава и забава во овој наш крај, ние го изградивме овој фестивал за да ја сочуваме и афирмираме традицијата на малешевските труби, но и звукот на трубите од Пехчево, да одекне надалеку во светот. Вечерва сум повеќе од убеден дека ја остваруваме целта, и од година во година се развиваме и тоа и го докажуваме, истакна Поповски.
Тој додаде дека Фестивалот има уште една приоритетна цела, а тоа е промоција на Пехчево како атрактивна туристичка дестинација, но самото одржување на фестивалот има и голем придонес во локаланта економија .
-Овој фестивал со години го посетваат десетици илјади гости. Очекувам така да биде и за време на овие три фестивалски вечери. Тоа многу значи за локалната економија, за развој на приватниот бизнис од областа на туризмот , а развојот на туризмот во овој дел од Малешевијата е нашата стратешка цел, истакна Поповски.
Проф. д-р Васил Ристов кој изминатите шест години беше член на жири- комисијата, истакна дека ова седмо издание на фестивалот има ревијален карактер и на сцената на Фестивалот ќе настапат најдобрите дувачки оркестри од Балканот.
-Шест години имавме одлични оркестри. Ние успеавме да одржиме квалитет на фестивалот кој е неповторлив за пошироки балкански рамки. Секогаш првонаградениот и второнаградениот на овој фестивал ги испраќавме на Гуча во Србија, каде го потврдуваа квалитетот. Така, Џамбо Агушев во 2011 освои во Пехчево златна труба, а во 2012, Агушеви беа најдобар орекстар во светот. Во 2013 Демир Кантуровски освои златна труба во Пехчево, а 2014, Кантуровски беше прогласен за најдобар оркестар во светот. Очекувам овој фестивал и понатаму да се развива, бидејќи е единствен фестивал во земјава каде дувачките оркестри од земјава имаат можност да покажат што знаат и умеат, истакна Ристов.
Вечерва освен дувачки оркестри од Макеоднија и Србија, свој концерт ќе имаат и Наум Петрески и Зуица Лазова.
Инаку, вчера беше отворен и етносаемот „Пехчевски Павловден“, каде на 16 штандови сместени на плоштадот во Пехчево „Св. Петар и Павле“, се промовира традицијата, преку ракотворби, производи од старите занаети и традиционалната храна од Малешевијата.
Фетсивалот е во организација на Општина Пехчево со поддршка на Хотел „Гогов“.
