Интернационалната програма “Учење за шумите” (Learning about Forest) на Фондацијата за еколошка едукација (ФЕЕ) и програмата ЕНО (ENO), по десети пат ја спроведуваат акцијата на садење дрва за создавање на одржлива иднина.
Јавната детска установа „7 Септември “ како еко градинка и општина Пехчево, се вклучуваат во акцијата „Засади дрво за мир“.
По тој повод триесетина дечиња облечени во блузи на кои на грбот им пишува ,, Моето дрво на мирот “ и вработените од детската градинка „7 Септември “ и вработените во локалната самоуправа предводени од градоначалникот Поповски, засадија дрвца (украсен даб ) на повеќе локации во Пехчево со што станаа дел од светската акција за мир и подобра животна околина.
Акцијата „Засади дрво за мир“ 2014 е во организација на Интернационалната програма „Учење за шумите“ (Learning about Forest) на Фондацијата за еколошка едукација (FЕЕ) и ЕНО програмата (ENO), додека во Република Македонија се спроведува преку Програмата „Интеграција на еколошката едукација во македонскиот образовен систем“.
Настанот ги поврзува децата од целиот свет, насочувајќи ги кон прашања од областа на животната средина. Што е уште поважно, настанот го промовира образованието за мир и ја зголемува свесноста на децата и учениците за важноста на дрвата и шумите во светски рамки. Садењето на дрва ја симболизира надежта и трајноста на животот.
Во рамки на Европската недела на движење и одбележување на Светскиот ден без автомобили – 22 Септември, конвој од над сто млади ученици од општинското основно училиште ,, Ванчо Китанов “, предводени од нивните наставници и градоначалникот Игор Поповски, денеска предпладне продефилира од центарот на Пехчево до училиштето, со што активно го одбележаа Светскиот ден без автомобили.
Градоначалникот Поповски упати апел и до возачите, не само денеска формално да се одбележува Светскиот ден без автомобили, туку колку што е можно почесто, дневните активности да ги вршат одејќи пеш или со велосипед со што ќе се заштити здравата животна средина и амбиенталниот воздух од штетни гасови и од бучава.
