По повод одбележувањето на Денот на победата над Фашизмот и Денот на Европа, како и 72-годишнина од загинувањето на првоборецот Ванчо Китанов денеска во ООУ кое го носи неговото име во Пехчево, се одржа промоција на монографијата „Бунтовна младост“ од авторот Иван Станоев.
Книгата е посветена на првоборците и народни херои Герас Цунев, Ванчо Китанов и Сандо Масев, кои, своите млади животи ги положија во борбата против Фашистите во Народно Ослободителната Борба пред седумдесет и две години.
За монографскиот труд на роднокрајниот хроничар и доајен на македонското новинарство – Иван Станоев говореа промоторите Јелица и Атанас Николовски.
На овој културен настан градоначалникот на Пехчево Игор Поповски со одбрани зборови ги поздрави учесниците и на гостите им го честиташе денешниот празник и авторскиот потфат на Иван Станоев.
– Светлите примери на борците за слобода треба и мора да се негуваат кај сите генерации, а посебно кај училишната и студентската популација. Посебна чест и задоволство ми причинува моментот и местото на промоцијата, од причина што токму ова училиште е единственото во Македонија кое го носи името на македонскиот првоборец и антифашист од Пехчево Ванчо Китанов, изјави авторот на монографијата „Бунтовна младост“ Иван Станоев.
