На вториот ден од одбележувањето на Недела на детето, прием за децата од градинката организираше градоначалникот Игор Поповски.
При посетата на општината Пехчево децата одблиску се запознаа со начинот на кој функционира локалната самоуправа.
,,Првата недела во месецот е Детска недела, а првиот ден е Светски ден на детето и по тој повод детската градинка ,, 7 Септември “ организира посета кај градоначалникот. Детската градинка секоја година си има програма со активности која што е доставена до сите институции во општината“, истакна директорката Гордана Вазлиска.
Децата се интересираа за работните обврски на градоначалникот, колку трае работното време на вработените во општината и други интересни прашања, а му се заблагодарија и за ново изградените детски игралишта во центарот на Пехчево.
,,Направивме детски игралишта во центарот на Пехчево за забава и рекреација за Вас децата.Се надевам дека во наредниот период ќе имаме поголем број на вакви игралишта и други содржини и за вас и за повозрасните деца, истакна Поповски.
Децата од градинката на градоначалникот му покажаа што знаат и умеат, му пееја песнички и му подарија рачно изработка на слика со логото на Светската недела на детето.
Тој на дечињата им подари пригодни подароци, а на учителките за потребите на децата им подари сликовница.
Градоначалникот се обрати и до децата посакувајќи им успешни училишни и безгрижни деттски денови.
,,Минувајте го слободното време во дружење, спортување и учење, бидејќи моќта е во знаењето. Сакајте ги своите родители, сакајте го своето семејство и почитувајте ги најблиските. Само така, Вашите родители ќе бидат горди на Вас, а покрај нив и ние како општина. Ви се обраќам денеска и како родител со пораката дека Вие сте нашето најголемо богатство”, додаде градоначалникот.
Инаку, детската градинка „7 Септември “ секоја година има своја програма за одбележување на Светската недела на детето, а оваа година детската недела ја одбележуваат под мотото „ Сите дечиња на светот имаат право и обврски“
