Милеуконтакт – Македонија со поддршка на УСАИД го реализираат проектот за поддршка на процесот за изработка на општински стратегии за климатски промени во Република Македонија.
Општина Пехчево е една од селектираните 8 општини кои со помош на програмата ќе добијат стратегија за климатски промени. Процесот на локално ниво е инициран партнерски меѓу Здружението Центар за лековити билки и шумски плодови Амброзија – Пехчево и општина Пехчево, а во изработката активно ќе бидат вклучени сите заинтересирани страни на локално ниво.
Во салата за состаноци во општина Пехчево беше оддржан првиот состанок на кој од страна на претставниците на Милеуконтакт – Македонија беше презентиран концептот на изработка на стратегијата за климатски промени со примена на принципот на Зелена агенда.
Зелена агенда е партиципативен и демократски метод за развивање и имплементирање на локални стратегии и планови за одржлив развој со активно вклучување на различни сектори од локалната заедница каде процесот се спроведува. Процесот е уникатен и посебен во споредба со другите процеси кои имаат слични цели од три аспекти:
1. Процесот започнува со идентификувањето на локалните вредности наместо на проблемите;
2. Учеството во процесот не е ограничено само на експерти и одредени чинители, туку тоа е сеопфатен процес кој е отворен за сите;
3. Самиот процес е резултат, а како и резултатите кои произлегуваат од него се придобивка за локалното население.
Следна активност е дефинирање на капацитетите на заедницата преку SWOT анализа, која ќе биде организирана на 18.04.2013 година ( Четврток ), во салата за состаноци на општина Пехчево.
