Општина Пехчево во соработка со Министерството за внатрешни работи, Министерството за здравство, Министерството за образование и наука и Црвен Крст, и оваа година го одбележа Светскиот ден на сеќавање на жртвите во сообраќајни несреќи.
По тој повод се организираа низа едукативни манифестации и хуманитарни акции, со цел да се зголеми безбедноста на сообраќајот на патиштата и да се намали бројот на жртви. Низ градот се вршеа сообраќајни контроли проследени со делење на едукативен и информативен материјал од областа на безбедност на сообраќајот на патиштата, а на градскиот плоштад во Пехчево беше организирана акција за мерење на крвен притисок и мерење на шеќер во крв, како и делење на информативен материјал за стари лица од страна на волонтери на Црвен крст.
Како што беше предвидено во Програмата за активности за одбележување на Светскиот ден на сеќавање на жртвите во сообраќајни несреќи, денес на 20.11.2014 година во ООУ ,,Ванчо Китанов,, – Пехчево имаше презентација од страна на полициски службеници за ,,Употребата на смартфони и конзумирањето на алкохол и психотропни супстанци опасни по животот на младите во сообраќајот“.
На учениците им беше укажано на ризикот со кој се соочуваат при истовремено користење на смартфон за време на управување со моторно возило, да не конзумираат алкохол и други психотропни супстанци и на тој начин да се заштитат себеси и останатите учесници во сообраќајот.
