Започна изградбата на дел од улицата 1 во Индустриската зона „Чуката“ во Пехчево

Општина Пехчево започна со реализација на проектот за изградба на дел од улицата 1 во Индустриската зона „Чуката“, со што продолжуваат инвестициите во развојот на деловната инфраструктура и создавањето поволни услови за економски развој.

Изградбата на оваа сообраќајница претставува значајна инфраструктурна инвестиција која ќе придонесе за подобрување на пристапноста и функционалноста на индустриската зона. Со реализацијата на проектот ќе се обезбеди поквалитетна патна инфраструктура за постојните стопански субјекти, а воедно ќе се зголеми атрактивноста на зоната за привлекување на нови домашни и странски инвестиции.

Општина Пехчево останува посветена на континуирано унапредување на условите за работа и развој на бизнис-секторот, препознавајќи дека современата инфраструктура е еден од клучните предуслови за економски раст, отворање нови работни места и зголемување на конкурентноста на локалната економија.

Воедно, Општина Пехчево апелира до сите компании кои работат во Индустриската зона „Чуката“ да ја почитуваат привремената сообраќајна сигнализација за време на изведбата на градежните работи, како и да избегнуваат паркирање на возила и вршење активности кои би можеле да го попречат непреченото движење на градежната механизација.

Општина Пехчево и понатаму ќе продолжи со реализација на проекти кои придонесуваат за подобра инфраструктура, поволен деловен амбиент и одржлив економски развој во интерес на граѓаните и стопанството.