Општина Пехчево продолжува со реализација на својата програма за уредување на патната инфраструктура во руралните средини. Денес започнаа изградбата на улицата во село Панчарево во должина од над 600 метри и широчина од 3,5м.
,,Овде изминатиот период интервениравме на повеќе начини, но по барање на мештаните денеска започнуваме со интервенции во патната инфраструктура. Се работи за улица во должина од над 600 метри, со коловозна конструкција од тампонски слој, ситен песок и завршна обработка со бехатон плочки’’, рече градоначалникот Поповски.
Вкупната вредност на овој проект изнесува над 3 000 000,00 денари средства обезбедени преку проектот за подобрување на општинските услуги (МСИП 2), финансиран со заем од Светска банка.
-Тоа е мал придонес на локалната самоуправа за враќање на жителите во селото. Најважно е овие луѓе да имаат инфраструктура. Планот на општината е за четири месеци, улицата да биде поплочена и пуштена во употреба. Останува уште многу, но најважно е да се реновира водоводот со што селото ќе има одлични услови за живот, истакна Поповски.
Според договорот со фирмата изведувач Урбан Инвест и согласно со динамичкиот план целокупниот проект треба да заврши во септември 2014 год., но според досегашниот интензитет на одвивање на работите се очекува тоа да биде и порано од предвиденото.
