Во рамки на проектот „Заедничка интегрирана политика за нискојаглеродна економија во прекуграничниот регион“ вчера во Пехчево во хотел Гогов се одржа завршна конференција.
Проектот е реализиран со подршка од Европската унија преку ИПА програмата за прекугранична соработка, а е имплементиран од страна на Здружението „Амброзија“ – Пехчево, во партнерство со Кластерот на обновливи извори на енергија од регионот на Благоевград.
Јасминка Пашалиска Андоновска од Здружението „Амброзија“ истакна дека целта на завршната конференција е да се презентираат резултатите од проектните активности, вклучително и заедничката политика за нискојаглеродна економија во прекуграничниот регион подготвена во рамки на проектот.
-Извршена е аналаиза на состојбата со јаглеродна емисија во пограничниот регион – беше подготвен инвентар за стакленички гасови за општините вклучени во проектните активности (Пехчево,Берово, Виница и Делчево од Македонија и Благоевград, Симитли, Кресна, Струмјани и Сандански од Бугарија). Извршен е и мониторинг на загадувањето на воздухот, од страна на акредитираните лабаратории во двата региона беше спроведен мониторинг на воздухот и подготвен е план за подобрување на квалитетот на воздухот, истакна Пашалиска – Андоновска.
Таа додава дека е подготвен и заеднички документ за нискојаглеродна прекугранична политика која е клучна активност на проектот, со кој се опфатени двете општини, со учество на локалните засегнати страни од двата региона.
Подготвени се извештаи за јаглероден отпечаток со препораки за јавните установи и деловните објекти во регионот, што ќе им даде рамка за следните активности за намалување на потрошувачката на јаглерод, додава Пашалиска – Андоновска.
Инаку, проектот се спроведуваше 15 месеци.
