Временските услови не беа пречка за пехчевци да излезат масовно и да го одбележат Денот на дрвото. Под мотото „За зелено Пехчево-засади ја својата иднина“ денеска градоначалникот Игор Поповски заедно со вработените од општината засадија над 50 садници црн бор.
Во разубавување и разеленување на зелената површина учествуваа сите ученици до деветолетка од основното училиште во општината и средношколците кои садеа во училишните дворови, а најмладите во градинките.
– Колку оваа акција ќе биде успешна зависи од нас самите. Ако ги чуваме и правилно ги одгледуваме новите садници истите за некоја година ќе не „наградат“ со почист воздух, поздрава и поубава околина за живеење. Затоа апелирам до своите сограѓани заедно да ги чуваме младите дрвца и да не дозволиме никакви вандалски однесувања затоа што чувајќи ги дрвцата ќе добиеме непроценливо богатство кое во иднина за нашите деца ќе значи и поубав свет, истакна градоначалникот Поповски.
Оваа акција ќе трае во текот на целиот месец и ќе бидат опфатени и делови од планината Буковик каде што веќе се подготвени дупки за садење нови дрвца. Ќе бидат засадени над 10 000 дрвца од видот Црн и Бел бор.
