Во просториите на Бизнис инкубаторот во Берово, вчера 25 општини и организации од Истокот на Македонија и од регионот на Благоевград, ги промовираа своите локалитети и атракции за развој на туризмот во рамки на туристичкиот форум „Туризмот во фокус“. Форумот е дел од европскиот проект „Одржлив развој на туризмот – средство за прекугранична кохезија и напредок“имплементиран од страна на здружение ,, Лешки ” – Берово во партнерство со здружението ,, На Фокус ” – Р.Бугарија, поддржан од ИПА програмата за прекугранична соработка.
Општина Пехчево учествуваше и на двата форуми организирани во рамки на овој проект и го презентираше своето културно богатство, историско наследство, туристичките локалитети и атракции преку поставување на штанд со материјали изработени токму за таа намена, а се претстави и со видео презентација пред присутните.
-Пехчево и нејзината недопрена природа, привлече големо внимание кај посетителите на форумот, кои имаа можност најдиректно на едно место да ја видат и да се запознаат со нашите локалитети и атракции, па и традиции и обичаи. Речиси сите домашни и странски посетители пројавија интерес за туристичките можности и потенцијали на Пехчево, истакна Живко Каликов од општина Пехчево.
Форумот претставува начин преку кој општините ќе можат да ги презентираат своите услуги, да остварат контакт и идни партнерства со општините од соседна Бугарија, истакна Ана Марија Теохарова од НВО „Лешки“ од Берово.
-Целта на проектот и завршна активност на овој проект е потпишување на меморандум за соработка меѓу општините од граничниот регион што ќе овозможи идни партнерства и соработка во идниот период. Во рамки на проектот се оддржаа два форума, првиот се оддржа пред една недела во Благоевград и сега во Берово, а впечатоците на учесниците од двата форуми се дека отвараат нови видици и можности за соработка, но и ги потврдуваат сите специфики и раритети во регионот како заедничка понуда за развој на туризмот, рече Теохарова.
Јанислава Вангелова од НВО „На Фокус“ потенцираше дека целта на проектот е да се обединат силите за да се подобри прекуграничната соработка и да се придонесе во зближување на организациите и институциите, односно оние кои работат во културниот сектор и сите оние кои се поврзани со туризмот.
На крајот на форумот градоначалникот на општина Пехчево, Драган Тренчовски, потпиша меморандум за идна соработка за развој на туризмот меѓу општина Пехчево и општините од регионот на Благоевград.
Инаку, проектот траеше 15 месеци, и во тој период се спроведуваа обуки на 50тина лица од двете страни на границата, а направена е и он-лајн платформа која треба на секој добронамерник кој сака да го посети пограничниот регион, да му ги отвори видиците за историските, природните и културните знаменитости на регионот.
