Струмичка Тиверија е новиот освојувач на трофејот во фудбалскиот Куп на Македонија во женска конкуренција, откако вчера попладнево во финалето кое се одигра на стадионот на ФК„Кит-го“ во Пехчево го совлада тимот на ЖФК Драгон од Скопје со убедливи 5:0.
Тиверија апсолутно доминираше на финалниот меч кој се одигра во убав амбиент во Пехчево.
По првиот дел, струмичанки имаа еден гол предност, а доминацијата ја потврдија со дури четири погодоци во второто полувреме.
Пред финишот на првите 45 минути, во мрежата на драгонки погоди Теодора Димоска, а потоа автори на погодоци беа уште капитенката Александра Ристовска, Рабиа Дервиши и Ангела Стојковска која беше двоен стрелец.
Пехчевци се покажаа како одлични и дисциплинирани навивачи бодрејќи ги и двете екипи, а општина Пехчево како одличен домаќин на финалето во женскиот фудбалски Куп на Македонија.
Трофејот за освоениот Куп на Македонија на фудбалерките на ЖФК Тиверија им го додели членот на Управниот одбор на Фудбалската федерација на Македонија, Светозар Станковски.
ФФМ за прв пат организира едно големо финале во крајниот исток и тоа во Пехчево, што значи уште една афирмација на спортот во овој дел на Македонија.
