Започна изградбата на комуналната инфраструктура на индустриската зона м.в Чуката – Пехчево, поточно фекална канализација со прочистителна станица за отпадни води.
Средствата за изградба на фекалната канализација со прочистителна станица за отпадни води, се обезбедени од страна на Министерството за транспорт и врски и општина Пехчево, со вкупна вредност од 3 092 359 денари.
Со поставувањето и на канализационата мрежа зоната ќе добие категорија на висока инфраструктурна уреденост, спремна да ги пречека новите инвеститори.
Во индустриската зона Чуката има водовод, но за изградбата на комплетната инфраструктура во зоната планираме да инвестираме многу средства, со што ќе се прошири сообраќајницата, ќе се изгради водоводна инсталација, атмосферска и фекална канализација, електроенергетска мрежа, телекомуникациска инфраструктура, како и улично осветлување. Со тоа Чуката ќе стане функционална целина која со своите карактеристики ќе може да им посака добредојде на сите потенцијални инвеститори во Пехчево. Местото на кое е лоцирана зоната на потенцијалните инвеститори ќе им овозможи добра комуникација со соседна Република Бугарија, рече градоначалникот Поповски.
Поповски истакна дека при крајот на месец септември ќе се изврши лицитирањето на 5 градежни парцели кои се со различна големина на индустриската зона Чуката.
Индустриската зона Чуката се наоѓа на површина од 8 хектари и е дел од градот Пехчево и според урбанистичкиот план е со намена Г2 – лесна и незагадувачка индустрија.
