Во Пехчево започна реконструкцијата на старата училишна зграда, каде ќе бидат сместени дисперзираните паралелки на беровската гимназија „Ацо Русковски“.
-Ова е прва реконструкција на овој училишен објект од неговата изградба. Ќе се реконструира буквално на сите позиции – покривот, прозорите, подовите, односно ќе добиеме современо училиште. Ова значи дека ќе ја вратиме образовната функција на старата училишна зграда. Средствата во целост ги обезбеди Министерството за образование и наука со вкупна вредност од 9 милиони денари, истакна Живко Каликов.
Во гимназијата СОУ „Ацо Русковски“ – Берово, дисперзираните паралелки во Пехчево учат 140 деца кои слушаат настава во 7 паралелки.
-Досега наставата се следеше во училници од деветолетката пру ООУ. „Ванчо Китанов“-Пехчево. Со реализацијата на овој проект ќе се реши големот проблем и за учениците и за наставниот кадар, што ќе значи подобри услови за работа, додава Каликов.
Изведувач на градежните работи е фирмата Алдинг Инжинеринг ДООЕЛ Скопје, а според најавите, градежните работи на старата училишна зграда треба да завршат до крајот на летото, а новата учебна година пехчевските средношколци ќе ја започнат во нови училници.
