Министерот без ресор Аксел Ахмедовски саботата престојуваше во работна посета на општина Пехчево каде оствари средба со градоначалникот Драган Тренчовски и со жителите на улицата 7 Септември.
Тој разговараше со градоначалникот за тековните и идни проекти поврзани со општина Пехчево. При престојот во Пехчево министерот без ресор задолжен за имплементација на Стратегијата на ромите, заедно со градоначалникот извршија увид на моменталната состојба на улицата „7 Септември“ , каде за краток временски период планирано е да се започне со изградба на улицата.
Градоначалникот Тренчовски посочи дека локалната самоуправа инвестира во подобрување на патната инфраструктура, осветлувањето, поставување на бекатон плочки и додаде дека наскоро жителите на улицата 7 Септември конечно ќе добијат нова уредена улица.
Тренчовски истакна дека е задоволен од досегашната соработка со Министерот без ресор Аксел Ахмедовски задолжен за имплементација на Стратегијата за подобрување на состојбата на Ромите во Република Македонија, чија цел е подобрување на инфраструктурните услови во општината, а со тоа и квалитетот на живот на граѓаните од ромска националност како и на сите жители во Општината.
Освен најавата за изградба на оваа улица, со средства обезбедени со Министерството за транспорт и врски со Одлука за распределба на средства од Буџетот на Република Македонија за 2018 година за подршка на имплементација на декадата и Стратегијата на Ромите, преку Акциониот план за ромите во општина Пехчево, во село Црник заврши изградбата на улицата од подрачното училиште Ванчо Китанов се до центарот на селото.
