По повод Светскиот ден на книгата и авторското право Матичната библиотека ,, Кочо Рацин ’’ – Пехчево, традиционално секоја година го одбележува овој ден.
Оваа година по повод Светскиот ден на книгата и авторското право 23 Април, вчера во Домот на културата ,, Јане Сандански ’’, а во организација на Матичната библиотека ,, Кочо Рацин ’’ се одржа трибина на тема ,, Креирање на позитивната енергија за 7 дена ’’ од Ниче Димовски.
Со неколку збора за авторот и содржината на делата на Ниче, најпрвин пред присутната публика се обрати В.Д директорката на библиотеката Габриела Костадинова.
Пред поголем број на почитувачи на неговите дела меѓу кои беше и градоначалникот на општина Пехчево Игор Поповски, свое обраќање имаше и самиот автор Ниче Димовски.
Тој истакна дека вистината ја открива во книгите кои ги пишува,како лично доживување во соочувањето со предизвикот меѓу смртта и животот.
-Во моите дела, преголема е љубовта за Македонија. Мојата перцепција ги покрива сите црни мисли против неа и ја рехабилитира, ја возобновува Македонија! Се друго е шпекулација. Војната ја победувам со мирот, омразата со љубовта, болеста со самодовербата, желбата со силата на волјата. Тоа се пораките во мислите кои ги пренесувам, во делата кои ги пишувам. Какви и да сме по боја, луѓе сме, ама нема срам дека сме бели, убави и Македонци! Радост е за мене преголема, затоа што интимното, од Бога благословено, за вистината, со сите го споделувам“ вели популарниот мислител, деец и писател Ниче Димовски.
Авторот вели дека во втората книга ,, Вистината на вечноста ’’ има три работи кои скоро и да не можат да се сретнат во светската литература. Првата е : патување во матичниот свет по смртта. Втората е : присуството на сопствениот погреб и најважната третата, како за седум дена да научите да бидете нешто за кое секој човек сонува.
Овој популарен мислител, деец и писател, кој има објавено повеќе читани книги во кои се занимава со психологијата на поединецот и вистинските вредности во животот и досега го практикуваше „Нано-Ниче метод“ во рамки на својата духовна терапија предвидена за седум дена.
По завршувањето на трибината Ниче оствари средба со своите читатели и на љубителите на неговите дела им потпиша неколку примероци од своите книги.
