Талентираните ученици од ООУ.„Ванчо Китанов“ кои добиле награди на државни натпревари во разни области, оваа година ќе бидат наградени од страна на локалната самоуправа.
Градоначалникот Поповски истакна дека локалната самоуправа и Советот на општината донеле таква одлука за нивно мотивирање и стимулирање, за да продолжат со одличниот успех во школувањето и во иднина достојно да ја презентираат општината.
Во тек е поднесувањето на потребната документација, а Општина Пехчево ќе ги награди сите ученици кои добиле награди на државни натпревари со благодарница и паричен надомест во вредност од 6000 денари за освоено I место, 3000 денари за освоено II место и 2000 денари за освоено III место.
Според Поповски, тие се наши амбасадори кои на вистински начин им покажуваат на идните генерации како да се грижат за напредокот и развојот на локалната средина и државата.
Во знак на благодарност за нивните постигнувања, на празникот на градот – Павловден (13 јули) на отварањето на Фестивалот на дувачки оркестри, градоначалникот ќе ги повика сите наградени и ќе им честита за успесите, а ќе им подели и благодарници: „за особени постигнувања и постигнати успешни резултати и афирмација во областа на образованието“
