Вчера во просториите на кафе бар „Ким“, по повод 45 години од раѓањето на авторот Габриела Костадинова се одржа промоција на книгата „Црвената боја на љубовта“.
Водителката Јасминка Пашалиска-Андоновска, ја започна промоцијата со читање на стихови од книгата, а главниот збор им припадна на рецитаторките Емилија Димевска, Јулија Велковска, Елица Јовевска, Оливера Кратевска и Јасмина Пандова, кои читаа песни од стихозбирката „Црвената боја на љубовта“.
Но, промоцијата немаше да биде тоа што беше доколку рецензентите и промоторите не го направеја своето. За творечкиот пат и придонесот на поетесата Габриела Костадинова за развојот на културниот живот во Пехчево говореа рецензентите Горјан Петревски- познатиот македонски писател и Ристо Стојанов-долгогодишен културен деец од Неготино и промоторите Вера Анастасова од Кочани и др.Нада Симовска од Пехчево кои кажаа позитивни и убави коментари за г-ѓа Габриела.
На промоцијата присуствуваше и градоначалникот на Општина Пехчево Игор Поповски, кој ги поздрави сите присутни и љубителите на поезијата, а на авторката Габриела и посака многу успех и нови творечки дострели.
Промоцијата заврши со поздравен говор и благодарност до сите присутни гости од страна на авторот Габриела Костадинова.
Промоцијата беше збогатена и со музички дел за кој се погрижи професорот по музичко образование Александар Парасков.
Промоцијата на стихозбирката ,, Црвената боја на љубовта “ прерасна во дружење на пехчевските љубители на книгата со гостите од Делчево, Берово, Кочани, Штип, Скопје кои дојдоа да ја споделат радоста со авторката чии 45-ти роденден се софпаѓа со 91 годишнина од библиотекарската дејност во прекрасното градче Пехчево.
Инаку, како што навестува и самиот наслов на книгата ,, Црвената боја на љубовта “, 75-те песни поместени во оваа книга, тематски се посветени на љубовта кон семејството, љубовта кон природата и татковината, на љубовта кон цвеќето, на родителската љубов, на љубовта кон убавините на животот.
,, Црвената боја на љубовта “ е втора книга на авторката што се појавува 16 години по нејзината дебитантска стихозбирка ,, Записи на болката “.
