Со средства од Бирото за регионален развој, општина Пехчево доби проект за Изработка на проектна документација за патна инфраструктура во пехчевските села Умлена,Робово, Црник и Панчарево, со цел да се осовремени инфраструктурата што ќе придонесе за развој во тие селски населби.
Како што истакна градоначалникот на Пехчево, Драган Тренчовски, потпишан е договор со фирма за изработка на проектна документација за патна инфраструктура за повеќето селски населби во општината.
-Општина Пехчево за да ја подобри состојбата на патната инфраструктура во селските населби аплицираше и доби финансиски средства од Бирото за регионален развој на Република Македонија за создавање на предуслови за рурален развој во село Умлена, Робово, Црник и Панчарево. Средствата се во вредност од 657.024 денари. Со овие финансиски средства ќе се изработат проекти, со кои ќе аплицираме до надлежните институции и до Влада на Р.Македонија за реализација на истите, рече градоначалникот Тренчовски.
Тој додава дека со вакви или слични проекти ќе се подобри квалитетот на животот во селата и ќе се даде придонес за намалување на иселувањето.
-Во изминатиот период селата беа целосно заборавени. Сега акцентот го ставаме на руралните подрачја и подобрување на квалитетот на живеење за сите граѓани, а особено таму каде што е најпотребно, во подрачјата со специфични развојни потреби и во селата. Ние сакаме да придонесеме во подобрување на квалитетот на животот во селата и со вакви и слични проекти ќе дадеме придонес за намалување на иселувањето и останување на младите, додаде Тренчовски.
Според договорот со фирмата изведувач ЕУРО РОАД ДИЗАЈН ГРОУП ДОО изработката на проектната документација треба да биде извршена за 30 дена.
