Вчера градоначалникот на општина Пехчево Игор Поповски во својот кабинет ги прими учениците при ОСУ ,, Ацо Русковски ’’ Берово подрачни паралелки Пехчево Андон Поповски и Ана Карафатска од Пехчево придружувани од нивниот ментот Ванчо Павловски и претставникот од Народна Техника – Берово Бистра Поп-Ѓорѓиева, возрасните иноватор Владко Капушевски и Васил Механџиски и директорот на ОСУ ,, Ацо Русковски ‘‘ Ефтим Гаштеовски кои учествуваа на саемот на изложба на пронајдоци, иновации, нови технологии, нови производи, технички унапредувања, индустриски дизајн, трговски марки и младинско креативно творештво МАКИНОВА 2013.
Причина за прием и пречек од страна на градоначалникот беа освоените 5 медали ( 3 сребрени и два бронзени ).
На изложбата на пронајдоци, технички унапредувања, нови производи и творештво за млади МАКИНОВА 2013, која се одржа во Скопје од 15 до 19 Октомври во организација на Сојузот на пронаоѓачи и автори на технички унапредувања на Македонија, ученикот Андон Поповски од Пехчево освои два медали и тоа: За експонатот ,, Центрифугален регулатор ’’ овои Сребрен Медал и за експонатот ,, Конусно нишало со практична примена ’’ – Бронзен Медал, а доби и Пофалница за млад конструктор – иноватор за трудот Центрифугален регулатор, додека Ана Карафатска од Пехчево освои бронзен медал за експонатот ,, Полиедри и авто-преклопувачки полиедарски структури ’’.
Владко Капушевски и Васил Механџиски во категоријата за возрасни иноватори освоија сребрени медали за проектот ,, Фулерени – Материјали на 21 век ’’.
На средбата со градоначалникот се разговараше за нивните експонати и постигнатите резултати на Макинова 2013 и им подари скромни подароци со желби за понатамошни успеси со кои ќе се гордееме сите!
– Ова е голем успех за Пехчево и Малешевијата, уште една важна потврда дека Малешевијата има потенцијал и дека секогаш кога има одлична работа има резултати. Знам дека имате вистински квалитет за да дојдете до уште поголеми резултати.Можам само да ви посакам уште многу успеси и секако во скоро време да ја збогатите својата кариера со златен медал. Јас само можам да ви ветам комплетна поддршка – изјави градоначалникот Поповски.
Од страна на сојузот на пронаоѓачи на Македонија на општината и беше доделена благодарница и се заблагодарија за подршката која им ја дава општина Пехчево.
– Им посакувам се најубаво. Уште еднаш им честитам за освоените медали. Тоа е голема афирмација за Пехчево и Малешевијата но и нивна лична афирмација. Се надевам дека успесите ќе бидат постојано со вас, и се надевам дека уште многу пати ќе имаме можност да се среќаваме. Ваша обврска е да учите, постојано и со самото тоа да се надградувате, додаде градоначалникот на општина Пехчево Игор Поповски.
