Во просториите на библиотеката „Кочо Рацин“ – Пехчево во присуство на читателите и љубителите на убавиот пишан збор, а во организација на тимот од библиотекари и директори се одржа промоција на книгите „На заминување“ и „Приказни од една младост“ од Ленче Китанова.
Габриела Костадинова библиотекар, а воедно и водителка на промоцијата истакна дека оваа промоција е во чест на двата празника Св.Трифун и Св.Валентин.
– „Ги испративме новогодишните празници и сега сме на почеток на еден нов период на една друга година полна со предизвици во која не очекуваат и нови активности. Поводот што денеска сме собрани овде во ова февруарско попладне е во чест на двата празника Св. Трифун и Св. Валентин со промовирање на две книги поезија и проза на една наша писателка Ленче Китанова“.- истакна водителката и библиотекар Габриела Костадинова.
На 14 Февруари се слави Св.Трифун- празникот на лозарите, денот кога се закројува лозјето, празникот на винарите, на виното и на сите љубители на овој пијалок на боговите. Но, на 14 Февруари се слави и Св.Валентин – денот на вљубените, кој од пред неколку години масовно го прифатија и го прославуваат младите од Македонија.- продолжи Костадинова.
Во продолжение Габриела ја прочита биографијата за Ленче Китанова-родена во Штип 1964 г. проф. по македонски јазик која освоила многу награди во Србија,Русија, Италија, Бугарија, Македонија меѓу кои и Гран-при на Рацинови средби, на литературната манифестација „Никола Кљусев“, на литературната манифестација „Ракатки“ и многу други. Во 2015 год. е прогласена за наставник на годината од Сојуз на просветни работници во Македонија.
Промоцијата продолжи со промовирање на збирката раскази од страна на промоторот Љупка Стојменова, наша сограѓанка, проф. по македонски јазик која живее и работи во Кочани. Дел од поезијата читаа и двете дами директорката на библиотеката Јасмина Цековска и проф. по македонски јазик Јулија Велковска. На крајот свое обраќање имаше и писателката која се престави пред присутните во библиотеката.
