На втората форумска сесија, која се одржа вчера на 31 октомври 2016 година, граѓаните ја продолжија работата околу изготвувањето на општинскиот буџет на Општина Пехчево за 2017 година, во рамките на спроведувањето на буџетскиот форум, кој е дел од програмата „Форуми во заедницата“.
Според утврдениот распоред на форумскиот процес, на оваа сесија учесниците беа информирани за планираните и реализирани приходи до 30.09.2016 година, како и за планираните приходи на општината за 2017 година од страна на Советникот на Одделението за финансиски прашања Анита Каракашовска.
Истовремено, беше презентирана и листата на приоритети за развој на општината за 2017 година, изготвена според предлозите на граѓаните, кои на општо задоволство можеа да заклучат дека најголем дел од нив можат да бидат прифатени и вклучени во буџетот на општината.
Учесниците, кои, според правилата на форумот, работеа по работни маси, предлагаа и нови и дополнителни извори за зголемување на приходите на општината, како што се воведување, туристичка такса, издавање на објекти под закуп и други извори, зголемување на процентот од ДДВ наменет за општините и слично.
Третата форумска сесија е закажана за 14 ноември 2016 година.
