Со звукот на звончето и официјално започна новата учебна година во ООУ.„Ванчо Китанов“ во Пехчево. Во општина Пехчево новата учебна година ја започнаа 305 ученици, додека во училишните клупи за прв пат седнаа 39 првачиња.
Градоначалникот Драган Тренчовски на сите првачиња, честитајќи им го првиот ден на училиште и посакувајќи им среќа и успех во учењето, им дари училишен прибор, а упати и честитки за првиот училишен ден и на сите ученици им посака успеси во новата наставна година.
-Од денес започнува вашата трка по знаења во која од ден на ден ќе бидете се побогати и побогати. Треба да ги почитувате и слушате вашите наставници, затоа што тие ви го мислат најдоброто, затоа што учителката е вашата втора мајка. Јас не се сомневам дека ќе биде така, бидејќи како што ве гледам, сите вие до еден сте прекрасни и умни деца. Првото училишно ѕвонче е само вовед во првата научена буква, првото напишано зборче, првата научена песничка, првата решена задача и уште многу други нешта. На тој начин ќе се стекнувате со нови знаења кои за вас ќе бидат од непроценливо значење. Затоа, бидете горди што тргнувате во училиште. Бидете горди што сте првачиња, рече во својот поздравен говор пред првачињата, нивните родители и наставниците, градоначалникот Тренчовски.
Инаку, денес градоначалникот Тренчовски ги посети и им посака среќна учебна година и на дечињата од детската градинка „7 Септември“ и на сите групи во градинката им подари сликовници.
