Како резултат на успешно завршениот процес за избор на општина Пехчево за учество во Програмата за општинско-корисна работа и спроведување на Јавниот оглас за евидентирани невработени лица за вклучување во Програмата за општинско-корисна работа соодветно на претходно потпишаниот Договор за соработка помеѓу Програмата за развој на Обединетите нации (УНДП) и општина Пехчево, во рамки на ОЈУДГ “7-ми Септември” Пехчево започна функционирањето на детски јасли.
Започнувајќи од 01.11.2013 година како резултат на почетокот на имплементацијата на Програмата за општинско-корисна работа во општина Пехчево во рамки на проектот Промовирање на одржливи вработувања IIи поддршка на Владата на РМ во спроведувањето на Оперативниот план за активни мерки на пазарот на труд за 2013 година, во општина Пехчево започна да се спроведува проектот “Детски јасли-нови социјални услуги во општина Пехчево”.Проектот претставува материјализација на евидентираната повеќегодишна потреба за воведување на услуга-детски јасли при ОЈУДГ “7-ми Септември” Пехчево.
Формалното одбележување на почетокот на проектот беше одбележан со отворање на реновираните простории на детските јасли во детската градинка во Пехчево од страна на Градоначалникот на општина Пехчево, г-н. Игор Поповски и Директорката на ОЈУДГ “7-ми Септември” Пехчево Гордана Вазлиска во присуство на родителите и децата запишани во детските јасли, претставници на МТСП и АВРМ како и вработените и ангажираните лица преку проектот во детската градинка во Пехчево.
Проектот “Детски јасли-нови социјални услуги во општина Пехчево” е дел од Стратегијата за социјално вклучување, социјална заштита и намалување на сиромаштијата во општина Пехчево 2011-2015 во насока на пошироките заложби на општината за континуирано унапредување на квалитетот на живот а со тоа и на социјалните услуги во општина Пехчево.
Проширувањето на дејноста на ОЈУДГ “7-ми Септември” Пехчево со отворањето на детски јасли подразбира проширување на згрижувачката дејност со деца од предучилишна возраст до 2 години и соодветно на активностите на проектот “Детски јасли-нови социјални услуги во општина Пехчево” подразбира социјална вклученост на 3 лица (2 лица НЕГОВАТЕЛИ и 1 лице ПОМОШНИК-НЕГОВАТЕЛ) преку работно ангажирање со скратено работно време-20 работни часа неделно за период од 9 месеци.
