Кон крајот на овој месец се очекува да заврши уредувањето на пехчевското Езерце, како уникатен барски еко-систем, проект кој Пехчево го работи со поддршка на Програмата за зачувување на природата во Република Македонија.
Целта на проектот „Уредување барски еко – систем „Езерце“, е да се сочува уникатноста на природната бара во која има жив и специфичен свет, но и како атракција да се понуди како содржина на граѓаните од општина Пехчево и на туристите кои ја посетуваат општината, за да уживаат во природните убавини што ги нуди овој крај.
– Во лoкалитетот, каде што се реализираат проектните активности, има природна бара во која има жив и специфичен свет, а и самиот простор околу барата е исполнет со природни убавини и го ставаме во прилог на едукација и рекреација на граѓаните, Со активностите од втората фаза од реализацијата на проектот, барскиот екосистем „Езерце“ е уреден со едукативни табли на кои има едукативни содржини за барскиот биодиверзитет, поставени се корпи за отпадоци, клупи за одмор и рекреација на граѓаните кои ќе го посетуваат овој локалитет, површината околу барата и во барата е хортикултурно уредена со растенија карактеристични за барскиот еко систем, поставена е платформа за набљудување на барата која може да служи и како отворена училница за едукација на целната група ученици и туристи, и целиот локалитет е осветлен со 9 канделабри, рече Јовевска.
Вкупната вредост на проектот изнесува 1.150.240 денари од кои 700.000 денари се финансирани од страна на Програмата за зачувување на природата во Република Македонија и финансиски средства издвоени од буџетот на општина Пехчево.
Овој проект претставува втора фаза или продолжување на проектните активности кои беа поддржани од страна на Агенцијата за финансиска подршка во земјоделството и руралниот развој во Република Македонија. Додека во првата фаза од реализација на овој проект која финансиски беше поддржана од страна на Агенцијата за финансиска поддршка во земјоделството и руралниот развој на Република Македонија, беше направено оградување на просторот, беа поставени летниковци за одмор и детски играчки за релаксација на најмладата популација – децата.
Проектот е во завршна фаза, а се очекува да биде промовиран наредниот месец.
