Дваесет и девет годишниот Влатко Крамарски од Пехчево беше најбрзиот и најсреќниот кој успеа да го фати Светиот крст во осветените води во реката Писа. Жителите на Општина Пехчево и оваа година масовно го одбележаа големиот христијански празник Богојавление – Водици.
Традиционално осветување на водата на пехчевска Писа се одржа во присуство на голем број верници од Пехчево, но сепак, најсреќен е 29-годишниот Влатко Крамарски од Пехчево, кој по прв пат го извади светиот крст од водите на ладната река Писа.
На традиционалното осветување на водата на реката Писа во Пехчево и оваа година учествуваа 15-тина млади пехчевци кои скокнаа во водата обидувајќи се да го фатат светиот крст во водите на реката Писа.
Крамарски го доби LCD – телевизорот што го доделува општина Пехчево, а градоначалникот на општина Пехчево, Игор Поповски, лично му го честиташе успехот, но и празникот на сите граѓани на Пехчево, од свое лично име и од името на општинската администрација, посакувајќи им љубов, почитување и успешна година на сите полиња.
Среќниот Крамарски на сите православни христијани им го честиташе христијанскиот празник Богојавление и посака многу среќа, радост и здравје.
На големата церемонија претходеше и водосвет во црквата ,, Св. Петар и Павле ’’ каде голем број верници беа присутни на Свечената Богојавленска литургија. Отец Горан и отец Љупчо му посака успех, среќа и благодет на најсреќниот на овогодинешните Водици, Влатко, како и на сите граѓани на Пехчево. Во нивната порака се повика на љубов, меѓусебна толеранција и почитување, во име на Светиот дух на Господ Бог кој според православното христијанство на овој светол ден му се јави на човештвото, за прочистување на неговото тело и дух, во водите на Јордан.
За многубројните посетители на оваа манифестација, која од година во година станува се помасовна, општина Пехчево и годинава обезбеди топли пијалоци за сите присутни.
Инаку, Богојавление – Водици е христијански празник кој се слави уште од вториот век. Поврзан е со крштавањето на Исус Христос во водите на реката Јордан од страна на свети Јован, кој оттогаш се нарекува Крстител. Фаќањето на крстот значи соединување на човекот со Христа.
