Со проект финансиран од Ипа програмата за прекугранична соработка Пехчево и Брезница од соседна Бугарија заедно ќе работат на развој на фестивалскиот туризам.
Проектот „Платформа за меѓуграничен фестивалски туризам на полето на културата и традициите“ денеска беше презентиран во Пехчево, кој има и уникатно лого, каде се исцртани планините Пирин и Влаина и сонцето кое ја осветлува фестивалската сцена со порака „Види ја културата, вкуси ја традицијата и слушни ги фестивалите“.
Преку овој проект ќе се подобрат туристичките потенцијали на регионот за зачувување и одржливо користење на природните и културните богатства, а Пехчево ќе ја изработи и стратегијата за развој на туризмот, истакна градоначалникот Игор Поповски.
-Проектот е интересен за нас како општина, бидејќи туризмот кај нас е во подем и е наша стратешка цел за економски развој. Во самиот проект имаме инфраструктурни градби и очекуваме да се развие туризмот, бидејќи ќе ги потенцираме и нашите туристички потенцијали, а ќе добиеме и стратегија за развој на туризмот, рече Поповски.
Освен фестивалите, во рамките на проектот, Пехчево ќе добие и туристичко-информативно биро и летна сцена каде ќе се одржуваат културните настани. Проектот е финансиран преку Ипа програмата за прекугранична соработка и е вреден 457 илјади евра, а 15% учество има и Владата на Р.Македонија.
Никола Каракашов, координатор на проектот во Општина Пехчево, истакна дека овој проект двете општини ќе го работат наредниве две години.
-Една од целите на проектот е да разменуваме искуства, како и да се подобри постоечката рурална туристичка понуда за одржлив развој на прекуграничниот регион, преку соработка во областа на фестивалскиот туризам. Во таа смисла, Пехчево веќе има еден востановен фестивал, тоа е Фестивалот на дувачки оркестри кој е единствен ваков фестивал во земјава, но во подготовка сме на уште еден фестивал кој исклучиво ќе биде наменет за фолклорот и традицијата, рече Каракашов.
Теодорина Тодорова, координатор на Проектот од Брезница потенцираше дека искуството на Пехчево за организирање фестивали ќе биде искористено за да може и Брезница да започне нова традиција и да организира фестивал и во Брезница.
-Благодарение на Општина Пехчево што се согласија заедно да го направиме овој проект, кој е втор проект по големина на Ипа програмата и да ги финансираме фестивалите од двете страни. Општина Брезница нема такво искуство како Пехчево во организирање фестивали и затоа ние ќе ги користиме искуствата на Пехчево за да организираме нов фестивал во Бугарија, за да ги покажиме традициите,обичаите, природното и кутурното наследство во овој дел од Бугарија.
