По повод денот на пролетта, на 21 март со почеток во 12:00 часот во просториите на ООУ „Ванчо Китанов“ во Пехчево се одржа работилница на тема „Природата е најубава во пролет“. Работилницата беше во склоп на проектот „Промовирање на интегриран пристап за одржливо управување со карактеристичните природни ресурси во Пехчево “ чиј имплементатор е Здружението за одржлив развој Милиеуконтакт – Македонија, а истиот е дел од Програмата за зачувување на природата во Македонија.
На работилницата учествуваа учениците од прво до петто одделение, кои под менторство на своите наставнички покажаа дека на детската креативност и нема крај. Со своите вешти рачиња изработија прекрасни цртежи, творби, креации од тесто, оригами од хартија и на свој начин ги претставија убавините на пролетта.
На работилницата, од страна на координаторот на проектот Ирена Кракутовска, учениците беа запознаени со проектот како и идните активности кои се поврзани со истиот. Дечињата си заминаа презадоволни со ветување дека со задоволство ќе учествуваат и во следните работилници.
