Во прилог на реализацијата на определбите на Владата за продлабочување на соработката со локалните заедници во Република Македонија, Министерот за труд и социјална политика Диме Спасов работно го посети Пехчево и заедно со градоначалникот Поповски ги слушнаа идеите и барањата на граѓаните, како и предлозите за нови проекти во градот.
Целта на посетата на Министерот Спасов беше да ги види искуствата на Пехчево од првиот локален проект за народна кујна, да слушне како функционира системот за социјална заштита и заложбата за изградба на старечки дом.
-Министерството за труд и социјална политика во континуитет го унапредува системот на социјалната заштита и презема мерки за поефикасна заштита на граѓаните кои што се наоѓаат во социјален ризик. Во оваа насока, посебно внимание се посветува на зголемувањето на достапноста на социјалната заштита и социјалната работа во местото на живеење на граѓаните и промовирање на пристапот на социјална работа во локалната заедница. Ќе помогнеме и во отварање на јасли во детската градинка ,, 7 Септември ‘‘ во зависност од буџетските средства во министерството и ќе се заложиме за реализација на идејата во Пехчево да се изгради дом за стари лица, истакна Министерот Спасов.
Посетата на општина Пехчево, Министерот за труд и социјална политика ја искористи и да го посети местото каде што е планирано изградба на старечки дом и ги посети и поздрави децата кои тренираат во Опен фан фудбалската школа.
Градоначалникот Поповски ги поздрави идеите на граѓаните и се залага за нивна реализација.
-Идеите, предлозите и сугестиите од граѓаните се основен двигател за креирање на нашата иднина. Наш основен приоритет се граѓаните на Пехчево нивните идеи и желби, односно нивните потреби. Нашите очекувања се дека во следниот период ќе добиеме што е можно повеќе средства за да ги реализираме нашите проекти за изградба на старечки дом, отварање на јасли во детската градинка ,, 7 Септември ‘‘, но и да ги подобриме условите на работниците кои работат во отежнати услови, рече градоначалникот на општина Пехчево.
