Пошумувањето е традиција која ги мобилизира граѓаните и ја подига свеста за природата. И оваа година Пехчево се приклучува кон акцијата „Ден на дрвото- засади ја својата иднина“. Денес акцијата „Ден на дрвото” успешно се реализираше на повеќе локации и тоа на Буковик на околу шест километри од Пехчево, до градскиот стадион, во паркот помеѓу улиците Гоце Делчев и Илинденска, во школскиот двор при ООУ ,, Ванчо Китанов “, во дворот на детската градинка и околу ЈКП ,, Комуналец “ -Пехчево.
Градоначалникот Поповски и вработените во администрацијата, пратеничката во Собранието на Р. Македонија, вработените од јавните претпријатија, учениците, наставниците и други граѓани на општината заедно со вработените во Македонски шуми зедоа активно учество во есенската акција „Ден на дрвото“, за да придонесат во создавањето на здрава и чиста животна средина за сегашните и идните генерации.
,, Во еден интересен амбиент продолжува акцијата. Акцијата стана убава традиција , на граѓаните им ја подига свеста за потребата од заштита на природата и ја разубавува нашата средина и го прави градот позелен и почист. И оваа година организирано засадуваме и во урбаниот дел на повеќе локации во градот. Локалната самоуправа и во иднина ќе продолжи да ги поддржува ваквите граѓански иницијативи, се со цел да даде свој придонес во унапредувањето на животната средина ”истакна градоначалникот Игор Поповски, нагласувајќи дека општината продолжува со сите еколошки мерки согласно одлуките на Советот и програмата на општина Пехчево.
Во збогатувањето на дрвниот фонд учество зедоа и учениците од основното општинско училиште ,, Ванчо Китанов ’’ и тоа учениците од прво до шесто одделение беа ангажирани во активности за еколошко уредување и засадување на шумски садници во училишниот двор, додека учениците од седмо до девето одделение како и учениците од дисперзираните паралелки од Пехчево при ОСУ. ,, Ацо Русковски “ – Берово засадуваа шумски садници на локацијата до градскиот стадион.
Активно учество за „Ден на дрвото“ зедоа и најмалите од детската градинка ,, 7 Септември и вработените кои чистеа и садеа дрвца во училишниот двор.
На денешната акција беа засадени околу илјада садници украсна смрча во градот, додека деновиве вработените во Македонски шуми, ПШС ,, Равна река “ – Пехчево засадија околу 12 илјади садници црн бор на планината Буковик.
